Kumiur
#4: Ien merkwerdu karr
Ann-tytt (Anna Bärger, fyödd Nordin) saggd åv itta fö mig iesn. Ǫ add ärt e frǫ mun sener, Smis-Ulda. E wa mes mųäbruä men, Birge Nordin, wa smǫpåyk. An wa naug ba fyr eld fem å gomol o byggd i ”Pensionatę” i Ǫsbymm. E wa somor og Birger add weri daitwi Sprittbokkwe o läkt. Da såg an ien kall, so kam uppte Spritt-bokkam. Birger add drust iemat ra weg o kumið inn i tşyötşe liuätkaipenð og yöpt að Ulda: ”Mun, mun, e kumb ien karr min SNĮUÄWAITNEVǪ uppte Spritt-bokkam!”
Ulda fuä läa o fikk luv lungen krippin. Ǫ wiss ukan Birger add si. E wa Lars Levander. Dar an ulld a nogum gamtfuäkum og ärǫ u ðie dalskeð, war an klä i kostym og add kringgt waitansk ǫ nevum.