Sovmorgun
I dşikk i fiuärd klass i skaulam og e wa witten. Warum indielaðer i lag o laę fingg ien poäng fö wenn gang noger i laę rennd 1¼ km ǫ skaiðum. Iessn mes addum sovmorgun fuär i ðait a skaulam lagum fö te renn åvmilsspuäreð innǫ skauln byrdes. E fuä snai stuflingur. Ig add ien armbandsklukk min sikundwaiser, so ig belld tågå tiðę min. E fätäs mjäst twe minuter innǫ klukka ulld werd iemmt. I stuäð attǫ skaulan, fyrti mįete frǫ gymnastiksalem o baie.
Etter ien minut ärd i no livän og undres ǫ wen eð wa frågan umm. Ig ärd e kam frǫ gymnastiksalem mes dörä fuär upp. Fuäst kam twä kullu kåytend uppfö trampum. Eð wa Gun-Britt o "Tuttan" o dier wa grą nakuger! Gun-Britt saggd noð a Solbritt o kasste sig ra weg auti sniuän. Solbritt staeð, ǫ twike sig. Gun-Britt kravleð i sniuä o "tweske" snįäu ǫ Solbritt. Sę kam rästn åv kulluäpem. Die twestaeð o byrd ǫ liuätrem. Nogrer add si mig. Olle fuär inn att, so strai die dugde.
I föstuä kullur i femt, sjäkst o sjuund klass add werið i bastun og ulld aut o rull runt i sniä. I bai ien åvminut, tast klukką war iemmt tjugu yvyr, innǫ i druäg til. I luä mes i fuär. I saggd it no a nogum wen ig add si an morgun. Ingger åv kullum saggd no a mig elld, men die wiss säkert ukin e wa so add stende dar upi ferunder o kuägoð ǫ ðiem. Ig uppes die fuär ini bastų o kam aut atten. Kanstşi ðier add lärt si sįo ette fuäst, so int e stuäd noge ðar aute.