Witteweglag
Eð add snie nordǫni Ǫsum iel da. Ien bil war ǫ weg frǫ Borgbjärrę ni muät bymm. E dşikk bra mes e bar åv niðyvyr, men i mųätlutę ette wegostşile a Snaipdalim wart e stopp. Kalln sǫ uäk biln bakkeð atter att o fesyökt iesn til, men itşe tuäg an si mįer eld ien litn bit upi bokkan. Snaipdalswe war int pluägað, so an fikk luv tågå sig uppyvy bokkan.
Mes an stuä da briewi biln o funndireð um an ulld lemmen biln o drag til o go fram a Brunnmåyr, so kam eð ien timbebil frǫ attǫter. We add og snįuäpluägsted o wa smal, so lastbiln dugd it tågå si föbi. Nu wa ðie twe so stuä dar ǫ weem o funndireð. Die fingg luv muko undǫ snįuä i wegokantem, so ðie belld fǫ biln a saidu.
Mes die jällt ǫ muko, kam Uäl-Ierk farend min senn bil. An staeð attona timbebilem o kam fram a diem. An föstuäð ur e war o saggd a diem, die belld ut muko. Dier undres ǫ wiso, men Ierk willd it sai åv. An saggd dier ulld sett sig i bilą o timbebiln ulld kumo nemmera. An bistemmd u ne biler ulld wårå. Sę sett an sig upǫ stötfangern min ryddjin muät lastbilem o sett styvlę muät baklukun ǫ bilem. Stşaufön i timbebilem saggd e wa fö fait, men Ierk dugd yvytålå an åk uppfö bokkan. Ollt dşikk bra, og oll trai bile belld fuärtsett.