Upi Nupp

Jä war eð iet bustell langgu,
iet jäldaus, no mjokstugur
o no laður.
Uppmin ruägardem
war e nogų fįos.
Ruägardn i ais įe rand i grasį
og ete fįosum ir e kwe no stakker
so mjäst gemas åv follbesraisę.

I dşär ien lian tu jųät.
I kuägär ǫ aikt so ar uärt kwere
o lieter ete nogum råstienum
men eð i funndirer ǫ ir it
bar eð i sir.

U war e mes die fuäst kam jųät
mes die såg aut plassn a buðum
o byrd ǫ timber?
Kam tşynä summu år
elld nesta somor?
U mitşi fuäk war e jär
mes buðä war i gangg sos mjäst?

Wen taingkt die so wa jä sienest somon?
Wiss die ðier ulld it kum att?
O wiso kam dier it att?

          Bengt Åkerberg